Question

If you love what you do, you don't have to work for the rest of your life 

اذا كنت تحب عملك فلن تحتاج ان تعمل بقية حياتك 

يعني اذا كنت تحب عملك فكل يوم سيمر عليك ستشعر بالمتعة لا المشقة، وعلي العكس اذا كنت لا تحبه فسيكون نصيبك التعب وعدم الاستمتاع

شاركنا موقفك من عملك، تحبه ام لا

وهل لديك حلولا لمن لا يحب عمله؟ 

Answer 1

مساء الخير سولي ❤️ بجد وحشتني مشاركاتك بطعمها الخاص وطابعها المتميز ❤️❤️

مبدئيا العمل ده هو اللي بيقضي الإنسان فيه أغلب وقته عشان يكون مستواه الإجتماعي كويس وعشان يوفر اللي هو عايزه في حياته وهكذا ...

الأولاد مثلا في سن المراهقه أو كده لازم يبدأوا يتعودوا انهم يلاقوا شغفهم وأحلامهم والأهم من كده " هواياتهم " مثلا حد بيحب التصميم حد بيحب التكنولوجيا حد بيحب البحث وهكذا ليه ده مهم .. هقولك دلوقتي ...

فترة التعليم هي فترة مهمة جدا في حياة الإنسان بس أحيانا التعليم لا يتوافق مع تفكير أو عقل بعض الأفراد المتميزين يعني بيكون نظام قائم علي الحفظ وعدم التفكير أو السؤال عن سبب اللي بيحصل عالم ميكانيكا الكم اتغير بسبب سؤال عن حاجه غير طبيعية او غير مألوفة للعلماء المهم نرجع لموضوعنا ففي الحالة دي بيلجأ الأفراد دول انهم يتوسعوا في البحث ومعرفة معلومات اكتر وتطوير مهاراتهم في اللي بيحبوه علي العكس من كده تماما بيكون في افراد مفيش عندهم طموح او غيره ولا عايزين يطوروا مهاراتهم او حتي يكتشفوها وده طبعا بسبب أولا الأهل ثانيا المجتمع وتفكيره الغريب ثالثا عدم وجود قدوات صالحة او غيره علي وجه المجتمع ووجود فقط الاشخاص السيئين وده مقصود لاغراض سياسية نبقي نتكلم فيها بعدين .. نرجع تاني لموضوعنا 

المهم لما بندخل الجامعة بيكون في أفراد كان ليهم حلم بس معرفوش يحققوه اما بسبب كسل او اسباب تانية وفي قسم تاني اللي هم كان عندهم حلم وهو اللي هم عايزينه بس بسبب الاه‍ل او ان المجتمع نظرته ليهم هتكون ازاي بيروحوا مغيرين كل اللي هم بيحضروا ليه من الطفولة ...

يتخرجوا وهم اصلا كارهين الدراسة وكارهين مجال عملهم وطالما الانسان كاره حاجه عمره ولا حتي في الأحلام هيتقنها اتذكر كان في مقولة قرأتها وكانت تقريبا كده " المعرفة التي تكتسب بالإكراه لا تمتلك أي سيطرة علي العقل " .

فهو لازم الانسان يختار طريقه من البداية عشان يقدر يبدع ويفيد نفسه والمجتمع ولو تفتكري لما قولتلك ان لازم الانسان يكون عنده هواية قلت كده عشان لو لم يوفق انه يحصل علي الكلية اللي بيحلم بيها يكون علي الأقل بارع في حاجه هو بيحبها فيقدر يبدع فيها .

أنا مش بشتغل طبعا بس أنا بحب دراستي فعشان كده بقدر ابدع فيها واطلع احسن ما عندي وكمان بطور مهاراتي في المجالات اللي بحبها وببحث وكده عشان كل ده هيعود عليا بالفائدة بعد كده .

بالنسبة للنصائح ففي قسمين رقم واحد ل اللي لسه مفيش عندهم شغل سواء لسه بيدرسوا او صغيرين والقسم التاني ل اللي بيشتغلوا بس مش حابين عملهم والنصائح للطرفين فيهم شبه من بعض .

نصيحتي ل اللي لسه بيدرسوا حاولوا انكم تتطوروا مهاراتكم وانكم تلاقوا هواياتكم اللي بتحبوها ومارسوها عشان تتقنوها لانها هتفيدكم سواء دلوقتي او بعدين في المستقبل .

أما بالنسبة ل اللي مش حابين عملهم أصلا .. ده خطأكم من البداية ولازم تتحملوه بس مش معني كده ان مفيش حل لا .. اتعلموا حاجات جديدة تقدر انها توفر ليكم مجالات اكتر للعمل وهيكون افضل انها تكون لها علاقة بالتكنولوجيا لانها فعلا هتكون مهمة جدااااااا في المستقبل ولا غني عنها كمان .

وبس كده .. ده كل اللي انا عايزه اقوله وبعتذر اني خرجت شويه عن الموضوع وأتمني ان كلامي كان فيه اي فائدة ...

شكرا جدا وبالتوفيق سولي ❤️❤️

Comments

اكيد ديما كلامك مفيد يا رنا
تخيلي الواحد يكون عنده هواية يستمتع بيها وبعدين تكون مصدر رزق له وكمان بتفيد صحته
واااو اكيد مفيش احسن من كده
شكرا رنا ع تعليقك المميز♥️

---

دائما اعشق كلامك اختي رنا ❤️
حقااا تفيديني بصوره لا تتخيليها ابدا ❤️
شكرااا جزيلا ⁦(✿^‿^)⁩

Answer 2

إن لم تحب عملك منذ البداية ، لا ترغم نفسك على الاستمرار فيه بحجة أنك ستحبه يوما ما .

حب العمل شرط للإبداع .

Comments

يعني مش ممكن الواحد يقنع نفسه بعمله فيحبه فيبدع؟
ان شاء الله Joe تحب ماتعمل فتستمتع وتبدع

---

نعم ، فإن الوقت يمر ولن تجد شغفك حتى تصل الستين ربما .
اللهم آمين إيانا وإياكم بالهناء

Answer 3

السلام عليكم ورحمه الله وبركاته ❤️ 

كيف حالك اتمني تكوني بخير ❤️

دائما كنت اكره المذاكره يعني فقط اذاكر من اجل التفوق وليس عن حب ولكن عندما علمت عن ذا امريكان أنجلش بدأت اتعلم اللغه لاني اريد ذالك وليس من اجل اي شيء اخر 

وايضا عندما علمت بطليق بدأت اتعلم التركيه عن حب ايضا وبدأت استمتع كثيرا بمشاهده الدروس والمذاكره 

ومن بعدها علمت ان جميع الاعمال تكون اسهل وأبسط بكثيير عن حب 

شكرااا لاستاذنا ابراهيم عادل فقد غير الكثيير في حياتي ⁦(✿^‿^)⁩ 

بالتوفيق⁦⁦(◠‿◕)⁩

Comments

وانا كمان بشكر استاذ ابراهيم لأننا فعلا مستمتعين بالتعلم
شكرااا الاء
وفقك الله ويسر عليك امرك♥️

Answer 4

يسعد ساكي سولي ويسعد مساكم جميعا ❤

انا باشتغل مهندسة وكانت رغبتي الاولي طب رغم اني بكره العنف والدم والتشريح والذي منه والحمد لله ربنا ما استجابش لدعوات بابا ههههههههه والحمد لله جالي هندسة وبردوا كنت مش طايقة نفسي بس بعد اول سنة عذاب وفي سنة اولي لاقيتني باحب الهندسة اتخرجت وانا باعشقها وباطبقها في كل حاجة حوليا ولما اشتغلت بقيت باعشقها اكتر وممكن اشتغل واطبق وانا مبسوطة بس اول لما بتقابل اي مدير او معظمهم يحسسك ان مجهودك ده ولا حاجة او ياخده وينسبه لنفسه او يكبرك بينك مابينه في الخفاء يعني ومع الادارة يطلعك فاشل بصراحة معظمهم كده الا من رحم ربي بس نصيحتي بعد خبرة سنين عمل في قاهرة المعز لو بتحب شغلك فعلا سيب كل ده وارمي ورا ضهرك كبر دماغك واشتغل وشغلك هو اللي هايعليك وهايدافع عنك مش انت ( ان الله يدافع عن الذين امنوا ) صدق الله العظيم لو طبقتها هاترتاح وقولونك العصبي هايهدي .

بس كده ....مش عايزة اطول عليكم

دمتم بخير جميعا ❤❤❤❤

Comments

اهم حاجه ان القولون هيدعيلنا ههههه
نفس اللي حصل معايا بابا وماما رغبتهم ادخل طب او صيدلة وخاصة اني متفوقة الحمد لله
بس قدر ربنا ان درجاثي ف الثانوية تكون أقل من اي سنة
ومحققتش حلمهم ودخلت تربية تخصص بيولوجي وسبحان الله الكلية مجالها يناسب شخصيتي جداااا
حبيت علم النفس ودراسة المناهج ودراسة علم الاحياء اللي علمني التأمل وعشق جمال الطبيعة والاهتمام بالنبات والحيوان
و اتعلمت الالقاء والقيادة والبريزنتيشن والعمل ضمن فريق من تخصصات مختلفة واطلعت ع مناهج جديدة زي منتسوري ووالدورف وغيرهم
وبقيت خبيرة العيلة ف التربية وبعض المهارات
وديما واخده دور الطبيب النفسي مع أصدقائي بسبب دراستي واني بقرأ كتير ف المجال ده ولاني بميل للصمت فبقدر افهم الناس احسن
انا اتعلمت كتير من دراستي ومن أصدقاء الجامعة اللي مفيش زيهم ف اخلاقهم فكليتي كانت رزق بالنسبالي
الحمد لله كثيرا
المهم يا ميرفت اني سعيدة جدااااا برسالتك، عارفه ليه
اولا لخفة ظلك المعهودة
وثانيا انا ف البداية اعتقدت ان معظم الناس ع zامريكان وطليق خريجين او ف كليات ع الاقل
وبعدين تفاجئت ان معظمهم اعدادي وثانوي يعني بعيد اوي عني ف المرحلة العمرية  
فده كان بيخليني احيانا اتردد اني اتفاعل ف الموقع
وبعدين لقيت ان الجميلة ميرفت خريجة ومهندسة عظيمة يعني مش لوحدي
الله يعينك ع المديرين اللي من النوع ده، اللي ينسب فضل غيره لنفسه ذنبه كبير
"لا تحسبن الذين يفرحون بما أتوا ويحبون ان يحمدوا بما لم يفعلوا فلا تحسبنهم بمفازة من العذاب ولهم عذاب اليم"
بحب اوي كلية الهندسة ودماغ المهندسين ودراستها بتفيد صاحبها جدا ع مستوى حياته الشخصية
موفقة حبيبتي♥️

---

تسلميلي يا سولي انا اللي مبسوطة اني قريت رسالتك وطلع في حد من زمن الفن الجميل ههههههه عمرو وفؤش  ههههههه لا بجد معجبة بشخصيتك وتأثيرك في اللي حواليكي وشغلة الطبيب النفسي لاني محتاجاها جدااااااا هههههههه ربنا يكرمك يا جميل ويفرح قلبك ويريح بالك  وتحققي كل اللي تتمنيه ويوفقك دايما ويرزقك كل الخير والفرح والسعادة ❤❤❤❤❤
اقولك علي حاجة شوفتي الاية اللي انت كتباها كنا في موقع ومهندس مننا من كتر اللي بيحصل طبعها وحطها علي الباب ههههههههه
دمت بخير وسعادة وفي رعاية الله يا جميل ❤❤❤❤